Child Safe Tourism

April 11, 2013

ຄໍາຫມັ້ນສັນຍາຂອງ Intrepid Travel ທີ່ຈະປົກປ້ອງ​ເດັກ​ໃຫ້ປອດໄພໃນອຸດສາຫະກໍາການທ່ອງທ່ຽວ

ການຊ່ວຍເຫຼືອເດັກ​ໃຫ້ປອດໄພຈາກການຂູດຮີດ ​ເປັນ​ໜຶ່ງ​ໃນ​ເປົ້າ​ໝາຍ​ຫຼັກ​ຂອງ Intrepid Travel ຕັ້ງແຕ່ກໍ່ບໍລິສັດ​ທ່ອງ​ທ່ຽວ​ພະ​ຈົນ​ໄພຂື້ນທົ່ວໂລກ ໄດ້ເລີ່ມດໍາເນີນການໃນອາຊີຕາເວັນອອກສຽງໃຕ້ໃນປີ 1989, ບໍລິສັດນີ້ດໍາເນີນການຢູ່ໃນ 120 ປະເທດທົ່ວ​ໂລກ ແລະ ​ໄດ້​ພາ​ນັກ​ທ່ອງ​ທ່ຽວປະມານ 100.000 ຄົນຕໍ່ປີ​ໄປ​ທ່ອງ​ທ່ຽວ​ສະຖານ​ທີ່​ຕ່າງໆ ທີມງານຂອງການທ່ອງ​ທ່ຽວທີ່ປອດໄພສໍາລັບເດັກ ຫຼື Child Safe Tourism (CST) ໄດ້ສົນທະນາກັບຜູ້ຈັດການຂອງ Intrepid ທ່ານ ​ເຈນ ຄຣາ​ເລ ​ເພຶ່ອທີ່​ຈະ​ຊອກ​ຫາ​ສິ່ງ​ທີ່​ເປັນ​ປັດ​ໃຈ​ສຳຄັນ​ທີ່​ເຮັດ​ໃຫ້ການ​ປົກ​ປ້ອງ​ເດັກ​ເປັນ​ເລື່ອງ​ທີ່ Intrepid Travel (IT) ຈັດ​ຕັ້ງ​ປະຕິບັດ​ໃນ​ວຽກ​ງານ​ຂອງ​ພວກ​ເຂົາ.


CST: Intrepid ​ເຂົ້າ​ມາ​ເຮັດ​ທຸລະ​ກິດ​ແບບປົກປ້ອງເດັກ​ໄດ້​ແນວໃດ.

IT: ຕັ້ງແຕ່​ໄລຍະການເລີ່ມຕົ້ນການດໍາເນີນງານຂອງບໍລິສັດ ພະນັກງານທ້ອງຖິ່ນ ໂດຍສະເພາະແມ່ນຫົວໜ້າທີມ. (ເຊິ່ງປະຈຸບັນມີພະນັກງານຫຼາຍກວ່າ 300 ຢູ່ໃນອາຊີ) ​ໄດ້ເຫັນຄວາມສ່ຽງຂອງເດັກໃນສະຖານ​ທີ່​ຕ່າງໆ ແລະໄດ້ເຫັນພຶດຕິ​ກຳ​ທີ່​ໜ້າ​ເປັນ​ຫວ່ງຫຼາຍ ຂອງນັກທ່ອງທ່ຽວບາງ​ຄົນ​ທີ່​ອາດ​ສາມາດ​ທີ່​ຈະ​ຂູດ​ຮີດ​ເດັກໄດ້. ພວກເຂົາໄດ້ສັງເກດເຫັນເດັກເຮັດວຽກຢູ່ໃນສະພາບແວດລ້ອມທີ່​ມີ​ຄວາມ​ສ່ຽງ​ເຊັ່ນ:

  • ຂາຍ​ດອກ​ໄມ້, ​ໂປດ​ສຄາດ ແລະ ​ເຄື່ອງປະດັບຢູ່ໃນປະ​ເທດຫວຽດນາມ.
  • ຂໍທານຢູ່ຕາມຖະຫນົນຫົນທາງຂອງປະ​ເທດລາວ.
  • ເຮັດວຽກຢູ່ໃນຮ້ານ​ບັນ​ເທີ​ງກາງຄືນ ຫຼື ຕາມສະຖານທີ່ທີ່ມີ​ຊື່​ສຽງ​ໃນ​ການ​ຂາຍ​ບໍລິການ​ທາງ​ເພດໃນປະເທດໄທ.
  • ສະແດງ​​ໂຊ໌ວຕ່າງໆໃຫ້ນັກທ່ອງທ່ຽວເບິ່ງ ຢູ່​ໃນ​ສະຖານ​ລ້ຽງ​ເດັກ​ກຳພ້າໃນປະ​ເທດກໍາປູເຈຍ.

ຫຼັງຈາກທີ່ພະນັກງານ Intrepid ​ໄດ້​ລື້​ງ​ເຄີຍ ແລະ ​ເປັນເພື່ອນກັບ​ເດັກໃນທ້ອງຖິ່ນເຫຼົ່ານີ້ ພວກເຂົາກໍ່ເລີ່ມທີ່​ຈະເຂົ້າໃຈບັນຫາຂອງເດັກຫຼາຍ​ຂຶ້ນ ພວກເຂົາກະຕືລື​ລົ້ນ​ທີ່​ຈະຊ່ວຍ​ໃນ​ການສ້າງສະພາບແວດລ້ອມການທ່ອງທ່ຽວ​ທີ່​ດີ​ຂຶ້ນ​ສຳລັບ​ເດັກ – ເພື່ອທີ່​ຈະ​ໃຫ້ເດັກໃນທ້ອງຖິ່ນໄດ້ຮັບປະໂຫຍດຈາກການທ່ອງທ່ຽວ ແທນທີ່ຈະຮັກສາ​ສະພາບ​ທີ່​ເປັນ​ໄພ​ອັນຕະລາຍຕໍ່ພວກເຂົາ​ໄວ້. ສຸດທ້າຍນີ້, ການທ່ອງທ່ຽວຄວນຈະ​ໃຫ້ຜົນປະໂຫຍດແກ່ນັກທ່ອງທ່ຽວ ​ແລະ ຊຸມຊົນ ຄວາມປອດໄພ ແລະ ອະນາຄົດຂອງເດັກຖືເປັນສິ່ງສໍາຄັນໃນການພົວພັນນີ້.


CST: Intrepid ສະຫນັບສະຫນູນການປະຕິບັດວຽກຂອງອົງການທີ່​ເຮັດ​ວຽກປົກປ້ອງເດັກໃນພາກພື້ນນີ້​ແນວ​ໃດ.

IT: Intrepid Travel ໄດ້ມີການຮ່ວມມືກັບອົງການຈັດ​ຕັ້ງສາກົນ ​ແລະ ​ທ້ອງ​ຖິ່ນໃນພາກພື້ນທີ່ສຸມໃສ່ການປົກປ້ອງເດັກ​ເຊັ່ນ: ​ໂຄງການເດັກ​ສະຫຼາດ​ຂອງ​ອົງການ​ເອັກ​ແຜດ​ສາກົນ, ​ໂຄງການ​ເດັກ​ປອດ​ໄພ ຂອງອົງການ​ເພື່ອນ​ມິດສາ​ກົນ ​ແລະ ​ໂຄງການ​ເດັກ-​ເສົາ​ຫຼັກ​ປ້ອງ​ກັນ ຂອງອົງການ​ສຸພະນິມິດ. ອົງການເຫຼົ່ານີ້ໄດ້​ໃຫ້ຂໍ້ມູນທີ່ໜ້າ​ເປັນ​ຫວ່ງ​ເຖິງບັນຫາ ​ແລະ ຍັງ​ສະ​ເໜີ​ວິທີ​ທີ່ Intrepid ສາມາດຊ່ວຍໄດ້. ຊຶ່ງ​ສິ່ງນີ້ໄດ້ກາຍເປັນຄຸນຄ່າຮ່ວມ​ກັນລະຫວ່າງອົງການ​ຈັດ​ຕັ້ງສາກົນແລະ Intrepid. ພວກເຮົາສາມາດທີ່ຈະບໍລິຈາກເງິນ ​ເພຶ່​ອສົ່ງ​ເສີມ​​​ໃຫ້ເກີດ​ການ​ໂຄສະນາຂອງການລິເລີ້ມການເຊື່ອມໂຍງໃນ​ອຸດສາຫະກຳ​ການທ່ອງທ່ຽວ ​ແລະ ​ເຜີຍ​ແພ່​ສື່​ການ​ສຶກສາ​ໃຫ້​ແກ່​ນັກ​ທ່ອງ​ທ່ຽວ. ​ໃນ​ທາງ​ດຽວ​ກັນ ພວກ​ເຂົາ​ໄດ້ສະຫນອງການຝຶກອົບຮົມໃຫ້ພະນັກງານ ພ້ອມ​ທັງ​ຄໍາແນະນໍາຈາກ​ຊ່ຽວຊານທີ່ເປັນປະໂຫຍດ ໃນປະ​ເດັນຂອງການຂູດ​ຮີດເດັກ ແລະ ວິທີການທີ່ພວກເຮົາສາມາດຊ່ວຍ​ເຫຼືອເດັກ​ໄດ້.


CST: ທ່ານແນະນໍາປະ​ເດັນ​ການຂູດຮີດ​ເດັກ​ໃຫ້​ນັກ​ທ່ອງ​ທ່ຽວ​ແນວ​ໃດ ແລະ ທ່ານ​ມີ​ວິທີ​ການ​ແນວ​ໃດ​ໃຫ້​ນັກ​ທ່ອງ​ທ່ຽວ​ມີ​ຄວາມ​ຮູ້​ຄວາມ​ເຂົ້າ​ໃຈ ທີ່​ຈະສ້າງ​ສະພາບ​ແວດ​ລ້ອມ​ການທ່ອງທ່ຽວ​ທີ່​ປອດ​ໄພ​ສຳລັບ​ເດັກ.

IT: ພວກເຮົາສົ່ງຕໍ່ຄວາມຮູ້ ແລະຂໍ້ມູນທີ່ພວກເຮົາໄດ້ຮຽນຮູ້ໃຫ້ແກ່ລູກຄ້າຂອງພວກເຮົາ ເພື່ອວ່າພວກເຂົາຈະສາມາດເລືອກສິ່ງທີ່ດີທີ່ສຸດ ໃນລະຫວ່າງການເດີນທາງພວກເຮົາໄດ້ສອນ​ໃຫ້ລູກຄ້າເປັນນັກ​ເດີນທາງທີ່ມີ​ຄວາມຮັບຜິດຊອບ ແລະ ພາ​ພວກເຂົາໄປ​ແຫຼ່ງທຸລະກິດ ແລະ ອົງການຈັດຕັ້ງທາງສັງຄົມທີ່ສະຫນັບສະຫນູນ​ເດັກ ແລະ ຄອບຄົວທີ່ມີຄວາມສ່ຽງ.

ການ​ຂໍ​ເຂົ້າໄປທ່ອງ​ທ່ຽວ​ສະຖານ​ລ້ຽງ​ເດັກ​ກຳພ້າ ​ເປັນ​ຄຳຂໍທີ່​ພົບ​ເຫັນ​ເລື້ອຍໆຈາກລູກຄ້າໃນໄລຍະຫລາຍປີຜ່ານ​ມາ, ສ່ວນໃຫຍ່​ແລ້ວລູກຄ້າມີ​ເຈດ​ຕະນາ​ທີ່​ດີ ແຕ່ມັນສະແດງ​ເຖິງການຂາດຈິດສໍານຶກ ແລະ ຄວາມຮູ້ກ່ຽວກັບຜົນກະທົບທາງລົບ ທີ່ການທ່ອງທ່ຽວສະຖານ​ລ້ຽງ​ເດັກ​ກຳພ້າສາມາດນຳ​ມາ​ສູ້ເດັກ​ໄດ້, Intrepid ໄດ້ນໍາໃຊ້ໂອກາດນີ້ເພື່ອສອນນັກ​ທ່ອງ​ທ່ຽວສິ່ງທີ່ເຂົາເຈົ້າຄວນ ແລະ ບໍ່ຄວນເຮັດ​ໃນເວລາຂອງເຂົາເຈົ້າພົບ​ປະ​ກັບເດັກທີ່ມີຄວາມສ່ຽງໃນທ້ອງ​ຖິ່ນ.


CST: ທ່ານຝຶກອົບຮົມພະນັກງານ intrepid ກ່ຽວກັບບັນຫາທີ່ລະອຽດອ່ອນເຫຼົ່ານີ້​ແນວໃດ?

IT: ຕັ້ງແຕ່ 1999 intrepid ​ໄດ້ຝຶກອົບຮົມພະນັກງານໃນພາກພື້ນອາຊີເວັນອອກສ່ຽງໃຕ້ ກ່ຽວກັບວິທີການເພື່ອປົກປ້ອງເດັກຈາກ​ການ​ລ່ວງ​ລະ​ເມີດ ໂດຍສະເພາະແມ່ນເດັກຜູ້ທີ່ອາ​ໃສຢູ່ ແລະ ເຮັດວຽກໃນສະຖານ​ທີ່ທ່ອງທ່ຽວຕ່າງໆ. ການຝຶກ​ອົບຮົມນີ້ສະຫນັບສະຫນູນຄວາມ​ຮັບຜິດຊອບຂອງພວກເຮົາ ໃນການທີ່​ຈະລາຍງານ ແລະ ການດໍາເນີນການໂດຍການ​ສອນ​ຫົວໜ້າທີມງານ ກ່ຽວ​ກັບສິ່ງທີ່ເຂົາຄວນເຮັດຖ້າຫາກວ່າພວກເຂົາສັງເກດເຫັນພຶດຕິກໍາທີ່​ໜ້າສົງໃສ.

ພວກເຮົາສາມາດທີ່​ຈະ​ເອົາ​ເນື້ອ​ໃນສໍາຄັນຂອງການຝຶກອົບຮົມນີ້ ​ເຂົ້າ​ໃນ​ຫຼັກສູດ​ການ​ຝຶກ​ອົບຮົມບັນດາຜູ້ນໍາທົ່ວ​ໂລກ ການປູກຈິດສໍານຶກນີ້ເຮັດໃຫ້ພະນັກງານ intrepid ໄດ້ລາຍງານຫຼາຍຄັ້ງ​ໃຫ້​ແກ່​ອຳນາດການປົກຄອງທ້ອງຖິ່ນ ແລະ ຕໍາຫຼວດສູນກາງຂອງອົດສະຕາລີ.

ພວກເຮົາຍັງໄດ້ສ້າງຕັ້ງນະໂຍບາຍຢ່າງເປັນທາງການ​ໃຫ້ທີມງານ ​ໃນ​ເວລາ​ທີ່​ໄປ​ທ່ອງ​ທ່ຽວ​ຕາມ​ໂຮງຮຽນ ​ແລະ ອົງການ​ທີ່​ເຮັດ​ວຽກ​ກ່ຽວ​ກັບ​ເດັກ ລວມທັງສະຖານ​ລ້ຽງ​ເດັກ​ກຳພ້າ. ນະໂຍບາຍນີ້ຊ່ວຍ​ໃຫ້ພະນັກງານ ແລະ ລູກຄ້າຂອງພວກເຮົາເຂົ້າໃຈວິທີທີ່ເຂົາເຈົ້າສາມາດຊ່ວຍເຫຼືອເດັກທ້ອງ​ຖິ່ນທີ່ມີ​ຄວາມ​ສ່ຽງ​ໄດ້. ສິ່ງໜຶ່ງທີ່ລູກ​ຄ້າສາມາດເຮັດໄດ້ແມ່ນບໍລິຈາກ​ເງິນ​ໃຫ້ອົງການທີ່​ເຮັດ​ວຽກ​ກ່ຽວ​ກັບເດັກ ໂດຍຜ່ານມູນນິທິ intrepid ວິທີນີ້ຊ່ວຍ​ເຮັດ​ໃຫ້​ລູກ​ຄ້າ​ໝັ້ນ​ໃຈ​ໄດ້ວ່າການສະຫນັບສະຫນູນຂອງເຂົາເຈົ້າໄດ້ຖືກນໍາໃຊ້ຢ່າງດີທີ່ສຸດ.


CST: ​ແມ່ນ​ຫຍັງ​​ເປັນບູລິມະສິດຕໍ່​ໄປ​ຂອງ intrepid ສໍາລັບການປົກປ້ອງເດັກ?

IT: JC: ພວກເຮົາມີຄວາມ​ຕັ້ງ​ໃຈສູງ ທີ່​ຈະຊອກຫາອົງການເພີ່ມເຕີມ ເພື່ອ​ເປັນຄູ່ຮ່ວມງານທີ່ຢູ່ໃນຂົງ​ເຂດ​ອື່ນໆ​ຂອງ​ໂລກ ບ່ອນ​ທີ່​ເຮົາ​ຄິດ​ວ່າ​ເດັກ​ອາດ​ມີ​ຄວາມ​ສ່ຽງ​ຕໍ່ການ​ຂູດ​ຮີດ​ໃນ​ການທ່ອງທ່ຽວ ​ໂດຍ​ສະ​ເພາະ​ແມ່ນ​ໃນອາຟຣິກກາ, ປະເທດມຽນມາ ແລະ ອາເມລິກາລາຕີນ, ​ເຊັ່ນດຽວ​ກັນ​ກັບ​ອົງການ​ຊ່ວຍ​ເຫຼືອ​ໃນ​ອາຊີ ທີ່​ຊ່ວຍ​ຝຶກ​ອົບຮົມ​ພະນັກງານ​ໃນ​ປະ​ເດັນ​ການ​ປົກ​ປ້ອງ​ເດັກ ​ແລະ ຊ່ວຍ​ໃຫ້​ຄວາມ​ຮູ້​ແກ່​ລູກ​ຄ້າ ​ແລະ ຊ່ວຍ​ເປັນ “ຫູ ​ແລະ ຕາ” ​ໃນ​ການ​ປົກ​ປ້ອງ​ເດັກ​ທ້ອງ​ຖິ່ນ.